IoT「智能農夫」推水耕種植

北京見到Symantec羅少輝，Victor剛升企業保安部門大中華首席運營官COO。Victor以前專注於技術，升職後兼管理銷售，Symantec又剛收購咗Blue Coat，又有大量整合要做，有排忙。

前EMC老頂Gabriel Leung離任後，去咗瑞士讀書，後來加入上市公司HKC香港通訊任執行董事，同時亦讀緊博士學位，聽講論文已經獲接納，如無意外明年八月就可獲博士學位。以前Gabriel多數介紹儲存，聽聞到HKC後開發IoT，頭炮講點樣應用IoT，幫助家居「智能農夫」以水耕種植系統，為家庭及銀髮族締造優質生活，相當有趣。

剛接中大研究及知識轉移服務處通知，話蕭啟陽（Sunny SIU）博士會到中大演講；蕭博士係ProphetStor（先智雲端數據) 亞太區首席策略師兼總裁，ProphetStorc從事以軟件定義儲存技術管理快閃記憶，可以根據不同工作負載改變儲存性質，相當有趣。蕭博士曾經做過博通(Broadcom) 大中華董事總經理；亦聯合創辦RMI微電子開發多核處理器，後來被NetLogic Microsystems收購，變成NetLogic亞太區總經理。

ProphetStor係前FalconStor亞太區總經理陳文賢（Eric Chen）創辦。Eric曾經同華裔軟件天才胡艾瑞徵（ReiJane Huai），共同創辦咗FalconStor。2011年胡艾瑞徵在紐約寓所自殺身亡，FalconStor團隊離開，成立ProphetStor，經過五年耕耘已响亞太區多個地方建立辦事處。胡艾瑞徵曾領導著名嘅Cheyenne，後來被CA收購，再創辦FalconStor，估唔到後來悲劇收場。

9月9日(星期五)，蕭博士會在中大康本國際學術園2樓 LT4講廳，講述「從學者到企業家 - 蕭啟陽博士旅程」。香港創科唔易，有實戰經驗者更少，有意創科者不應錯過。